कापूरहोळ( प्रतिनिधी):-
(महाराष्ट्र वार्ता ऑनलाईन)
वाबळेवाडी शाळेच्या धर्तीवर शाळा व शिक्षण प्रक्रिया विकसित करण्यासाठी भविष्यवेधी
शिक्षण ऑनलाईन कार्यशाळा, शाळा व विद्यार्थी विकसनासाठी उपयुक्त ठरणार असून हे
ऑनलाईन प्रशिक्षण प्रत्येक शाळेसाठी व शाळेतील प्रत्येक शिक्षकांसाठी दीपस्तंभ ठरणार असून शिक्षकांनी या ऑनलाईन कार्यशाळेच्या माध्यमातून दर्जेदार शिक्षण व आदर्श शाळा निर्माण करा असे आवाहन पुणे जिल्हा परिषदेचे उपाध्यक्ष तथा शिक्षण सभापती रणजित शिवतरे यांनी केले.
भविष्यवेधी शिक्षण या विषयावर भोर तालुक्यातील प्राथमिक शिक्षकांचे तीन दिवसीय ऑनलाईन कार्यशाळेचे आयोजन 27 जुलै 2020 ते 29 जुलै रोजी सकाळी 11 ते दुपारी 1 या वेळेत गुगल मीट या ऍपवर हे प्रशिक्षण होणार आहे. शिक्षण विकसन प्रक्रिया व वाबळेवाडी शाळेच्या धर्तीवर शाळा व शिक्षण या विषयांवर आधारित हे प्रशिक्षण असणार आहे.
या कार्यशाळेस पुणे जिल्हा परिषदेचे उपाध्यक्ष तथा शिक्षण सभापती रणजित शिवतरे,पुणे जिल्हा परिषदेचे शिक्षणाधिकारी सुनिल कुऱ्हाडे, भोर पंचायत समितीचे गटविकास अधिकारी विशाल तनपुरे,भोर पंचायत समितीचे गटशिक्षणाधिकारी के. डी. भुजबळ,डायटचे निलेश घुगे,वाबळेवाडी शाळेचे मुख्याध्यापक दत्तात्रय वारे,व त्यांची टीम हे या ऑनलाइन कार्यशाळेस मार्गदर्शन करणार आहे.
या ऑनलाईन कार्यशाळेत आंतरराष्ट्रीय दर्जाचे शिक्षण व आंतरराष्ट्रीय शाळा बाबत संकल्पना व कार्यप्रणाली समजावून घेणे,वाबळेवाडी शाळेतील अध्ययन व अध्यापन प्रकिया स्वरूप , विद्यार्थ्यांच्या 100% क्षमतांचा उपयोग करणे, जगाच्या बदलाची गती व आधुनिक शिक्षण प्रक्रिया बदलाची गती जाणून घेऊन विद्यार्थी विकास साधणे,वाचन साहित्य निर्मिती उपयोगाबाबत मार्गदर्शन व विद्यार्थ्यांसाठी शैक्षणिक साहित्य निर्माण करणे,स्व पातळी , समाज आणि प्रशासन पातळी समजावून घेणे, वर्ग रचना आणि शिक्षक भूमिका, मुलांच्या जिज्ञासा वृत्ती चा सन्मान करणे, आंतरराष्ट्रीय वाबळेवाडी येथील शाळेतील शिक्षक आणि विद्यार्थ्यांशी चर्चा व संवाद साधणे,आधुनिक तंत्रज्ञानात शिक्षक व विद्यार्थी भूमिका, तसेच शाळेतील विद्यार्थ्यांची 100 टक्के उपस्थिती व पटनोंदणीबाबत मार्गदर्शन, प्रत्येक इयत्तेतील विविध विषयांतील किमान अध्ययन क्षमता प्राप्त बाबत मार्गदर्शन व उपाययोजना, अध्ययन व अध्यापन प्रकिया परिणामकारक व आनंददायी करण्याबाबत मार्गदर्शन व उपक्रमाबाबत चर्चा, शाळेतील विविध शालेय व सहशालेय व आधुनिक उपक्रमाबाबत चर्चा, आदी बाबींवर हे प्रशिक्षण असणार आहे.
तालुकास्तरीय प्रशिक्षणासाठी प्रथम टप्प्यात 250 शिक्षकांची निवड केलेली आहे.गुगल मीट लिंक प्रशिक्षणाच्या आदल्या दिवशी देण्यात येणार आहे.भोर तालुक्यात एकूण 704 शिक्षक आणि 14 केंद्रप्रमुख असे 714 जण कार्यरत राहणार आहेत. प्रत्येक केंद्रातील पहिल्या टप्प्यात 33 टक्के शिक्षक कार्यशाळेस ऑनलाईन उपस्थित राहणार आहेत. सदर प्रशिक्षणासाठी फक्त निवड झालेल्या भोर तालुक्यातील 100 टक्के शिक्षकांनी ऑनलाइन उपस्थित राहण्याचे आवाहन भोर पंचायत समितीचे गटशिक्षणाधिकारी के. डी. भुजबळ यांनी केले आहे.
